एजेन्सी । अमेरिकी राष्ट्रपति डोनाल्ड ट्रम्पको संरक्षणवादी व्यापार नीतिका कारण अर्थतन्त्र प्रभावित भएपछि क्यानाडाले अमेरिकामाथिको निर्भरता घटाउने र व्यापारिक सम्बन्ध विविधीकरण गर्ने लक्ष्यसहित नयाँ बजेट सार्वजनिक गरेको छ ।
प्रधानमन्त्री मार्क कार्नी नेतृत्वको सरकारले बिहीबार संसद्मा प्रस्तुत गरेको बजेटलाई ‘आफ्नो भविष्यको निर्णय आफैँ गर्ने’ योजनाका रूपमा अघि सारेको छ । कार्नीले क्यानाडा र अमेरिकाबीचको सम्बन्ध स्थायी रूपमा परिवर्तन भइसकेको भन्दै ट्रम्प प्रशासनअघिको शुल्कमुक्त व्यापारिक अवस्था फर्कने सम्भावना नरहेको बताएका छन् ।
अर्थमन्त्री फ्राँस्वा–फिलिप शाम्पेनका अनुसार बजेटको मुख्य उद्देश्य घरेलु व्यापार प्रवर्द्धन गर्नु र अन्तर्राष्ट्रिय साझेदारी विस्तार गर्नु हो । बजेटमा ऊर्जा उत्पादन, महत्त्वपूर्ण खनिज उत्खनन तथा पूर्वाधार विकासलाई प्राथमिकता दिइएको छ ।
अमेरिकी भन्सार शुल्कबाट प्रभावित अटोमोबाइल र स्टिल उद्योगका श्रमिकलाई सहयोग गर्ने कार्यक्रम पनि बजेटमा समेटिएको छ । सरकारले घरेलु उत्पादन र उद्योगको क्षमता विस्तार गर्दै अमेरिकी बजारमाथिको निर्भरता कम गर्ने रणनीति अघि सारेको हो ।
यसैबीच, अमेरिकी मध्यावधि निर्वाचनमा रिपब्लिकन पार्टीले पराजय भोगेपछि क्यानाडामाथि लगाइएका भन्सार शुल्कको भविष्य थप अनिश्चित बनेको छ । डेमोक्रेटिक पार्टीका सांसद जेमी रास्किनले आफ्नो पार्टीले शुल्क हटाउने र क्यानाडासँगको सम्बन्ध सुधार गर्ने बताएका छन् । तर, क्यानाडाका व्यापारमन्त्री डोमिनिक लेब्लाङ्कले भन्सार शुल्कसम्बन्धी वार्ता अमेरिकी कङ्ग्रेससँग नभई ह्वाइट हाउससँग हुने स्पष्ट पारेका छन् ।
सरकारले नयाँ बजेटमा बजेट घाटा गत वर्ष अनुमान गरिएको ७८.३ अर्ब क्यानाडाली डलरभन्दा कम रहने अपेक्षा गरेको छ । यसअघि बजेट पारित गर्न विपक्षी दलको सहयोग आवश्यक परेको प्रधानमन्त्री कार्नी नेतृत्वको लिबरल पार्टीले अहिले संसद्मा बहुमत प्राप्त गरेको छ, जसले आर्थिक तथा व्यापारिक नीति कार्यान्वयन गर्न सहज हुने अपेक्षा गरिएको छ ।
