नेपाली चलचित्र ‘लालीबजार’ दसैंको फूलपातीबाट ओटिटी प्लेटफर्म डिगोमा सार्वजनिक भएको छ। वैशाख २५ गतेदेखि देशभरका हलमा प्रदर्शनमा आएको यो फिल्म अब डिगो एपमार्फत विश्वभरका नेपाली दर्शकले एकसाथ हेर्न पाउनेछन्।
आमा र छोरीको सम्बन्धको कथामार्फत शिक्षाको महत्व उजागर गर्ने फिल्मको निर्माण षट्कोण आर्ट्सले गरेको हो। कथा लेखन तथा निर्देशन यम थापाले गरेका छन् भने पटकथा र संवाद थापा र प्रदीप भट्टराईले संयुक्त रूपमा लेखेका छन्। कार्यकारी निर्माता प्रदीप भट्टराई हुन् भने म्याक्स दीपेश खत्री र रविन्द्रसिंह बानियाँ निर्माताका रूपमा छन्।
फिल्ममा स्वस्तिमा खड्का, रविन्द्रसिंह बानियाँ, समाइरा थापा, मुकुन्दकुमार श्रेष्ठ, अभय बराल, प्रेम पाण्डे र आशा पौडेललगायतका कलाकारको अभिनय छ। यही फिल्ममार्फत विशाल देवकोटा र प्रशंसा सुवेदीले अभिनयमा डेब्यु गरेका छन्।
निर्माता तथा कलाकार रविन्द्रसिंह बानियाँले विभिन्न कारणले फिल्मलाई विदेशका थुप्रै ठाउँमा प्रदर्शन गर्न नसकिएकाले ओटिटीको बाटो रोजिएको बताए। उनका अनुसार सामाजिक सञ्जालमा विदेशमा रहेका नेपालीले निरन्तर फिल्म हेर्न चाहेको जिज्ञासा राखिरहेकाले डिगोमार्फत नेपालसँगै विदेशका नेपालीमाझ फिल्म पुर्याइएको हो।
नेपालको इजाजतपत्र प्राप्त पहिलो सब्स्क्रिप्सन ओटिटी प्लेटफर्मका रूपमा चिनिने डिगोले नेपाली चलचित्र, वेबसिरिज, खेलकुद र मनोरञ्जनका सामग्री स्ट्रिम गर्दै आएको छ।
