चालु आर्थिक वर्ष २०८३/८४ को पहिलो तीन महिनामा नेपालमा १६ अर्ब २३ करोड १९ लाख ५५ हजार रुपैयाँ बराबरको प्रत्यक्ष वैदेशिक लगानी प्रतिबद्धता आएको छ। उद्योग विभागले सार्वजनिक गरेको तथ्यांकअनुसार साउन, भदौ र असोजमा ४२२ वटा नयाँ उद्योग तथा परियोजनामार्फत उक्त लगानी स्वीकृत भएको हो।
स्वीकृत परियोजनामध्ये ४१० वटा स्वचालित मार्गबाट १४ अर्ब ५८ करोड रुपैयाँ र १२ वटा स्वीकृति मार्गबाट १ अर्ब ६४ करोड ५४ लाख रुपैयाँ बराबरको लगानी भित्र्याउन स्वीकृत भएका छन्। महिनागत रूपमा साउनमा १९२ परियोजनामार्फत करिब ४ अर्ब ७७ करोड २८ लाख, भदौमा १३६ परियोजनामार्फत ६ अर्ब ३५ करोड १५ लाख र असोजमा ९४ परियोजनामार्फत ५ अर्ब १० करोड ७५ लाख रुपैयाँ प्रतिबद्धता आएको छ। असोजको लगानीबाट ५ हजार १२९ जनालाई रोजगारी प्राप्त हुने प्रस्ताव गरिएको छ।
अघिल्लो आर्थिक वर्षको सोही अवधिसँग तुलना गर्दा प्रतिबद्धता निकै घटेको छ। गत वर्षको पहिलो तीन महिनामा ३५ अर्ब रुपैयाँभन्दा बढी प्रतिबद्धता आएको थियो। त्यसमा साउनमा करिब २४ अर्ब, भदौमा करिब ९ अर्ब र असोजमा ३ अर्ब रुपैयाँ थियो। चालु वर्षको सुरुवाती महिनामा विदेशी लगानीकर्ताको उत्साह गत वर्षको तुलनामा कमजोर देखिएको छ।
रकमका आधारमा पर्यटन क्षेत्र पहिलो रोजाइ बनेको छ। पर्यटनमूलक १०८ परियोजनाका लागि ६ अर्ब ८ करोड २८ लाख रुपैयाँ प्रतिबद्धता आएको छ। ऊर्जा क्षेत्रमा दुई परियोजनाका लागि ४ अर्ब, सेवामूलक ३३ परियोजनामा ३ अर्ब ५७ करोड ५४ लाख र उत्पादनमूलक २५ परियोजनामा १ अर्ब ६० करोड ५३ लाख रुपैयाँ आएको छ। संख्याका आधारमा सूचना प्रविधि अगाडि छ, २५२ परियोजनामा ९२ करोड ८३ लाख रुपैयाँ मात्र प्रतिबद्धता आएको छ।
