काठमाडौं । बडादसैंको समापनको दिन पारेर राष्ट्रपति रामचन्द्र पौडेल आइतबार भक्तपुर पुगेका छन्। उनले त्यहाँको ऐतिहासिक नवदुर्गा मन्दिरमा विधिपूर्वक पूजाअर्चना गरे। यस अवसरमा प्रथम महिला सविता पौडेल पनि उनीसँगै थिइन्।
राष्ट्रपतिले नवदुर्गा भवानीको दर्शन गरेपछि ऐतिहासिक तलेजु मन्दिरबाट ल्याइएको प्रसाद र टीका ग्रहण गरे। मन्दिर परिसरमा पुग्दा व्यवस्थापन समितिका पदाधिकारी, जिल्ला सुरक्षा समितिका अधिकारी, स्थानीय जनप्रतिनिधि र सर्वसाधारणले उनलाई भव्य स्वागत गरेका थिए।
कोजाग्रत पूर्णिमाको दिन राष्ट्रप्रमुखले भक्तपुरको यो प्रसिद्ध मन्दिरमा पुगेर दर्शन गर्ने परम्परा निकै पुरानो हो। सोही परम्परालाई निरन्तरता दिँदै राष्ट्रपति पौडेल अपराह्न भक्तपुर पुगेका हुन्।
पूजाको क्रममा मन्दिर परिसरमा परम्परागत नवदुर्गा नाच र सांस्कृतिक नृत्य पनि प्रस्तुत गरियो। राष्ट्रपतिले ब्रह्मायणी, महेश्वरी, कुमारी, वैष्णवी, वाराही, महाकाली, महालक्ष्मी, त्रिपुरासुन्दरी र भद्रकालीसहित नवदेवी देवगणका मूर्तिको अवलोकन गरे। उनले नवदुर्गाका पुजारी, मूल नाइके र देवगणलाई परम्परागत दक्षिणा प्रदान गरे भने मूल नाइकेले उनलाई तलेजु भवानीको मन्दिरबाट ल्याइएको जमरा, रातो टीका र विशेष प्रसाद दिए।
