काठमाडौं । राष्ट्रिय स्वतन्त्र पार्टी (रास्वपा) का सांसद बदन भण्डारीले अर्थमन्त्री डा. स्वर्णिम वाग्लेको पछिल्लो मन्तव्यको पक्षमा खुलेरै बोलेका छन्। भारतको नयाँदिल्लीमा वाग्लेले दिएको अभिव्यक्ति सुझबुझका साथ आएको उनको दाबी छ।
आइतबार काठमाडौंमा भएको एक साक्षात्कारमा भण्डारीले भारतको विरोध गरेर मात्रै नेपालमा राष्ट्रवादी देखिने चलन अब सकिएको भन्ने अर्थमन्त्रीको भनाइ सही रहेको बताए। उनले त्यस विषयमा अनावश्यक टीका–टिप्पणी गरिरहनुपर्ने आवश्यकता नरहेको धारणा राखे।
अर्थमन्त्री वाग्ले अहिले भारत भ्रमणमा छन्। भ्रमणका क्रममा नयाँदिल्लीमा आयोजित एनडीटीभी वर्ल्ड समिट २०२६ मा बोल्दै उनले नेपाली राष्ट्रवादलाई भारतविरोधका रूपमा हेर्ने युग सकिएको बताएका थिए। उनले नेपालीहरूको आकांक्षा आर्थिक रहेको, राम्रो रोजगारी, सुशासन र असल छिमेकी सम्बन्ध चाहिएको बताएका थिए।
वाग्लेको उक्त भनाइबारे विभिन्न तहबाट आलोचना भइरहेका बेला रास्वपा सांसद भण्डारीले भने त्यसको बचाउ गरेका हुन्।
फरक प्रसंगमा भण्डारीले सरकारले कार्यकालको छ महिना पार गरिसकेको उल्लेख गर्दै अहिलेको सबैभन्दा ठूलो चुनौती महँगी नियन्त्रण रहेको बताए। महँगी घटाउन सरकारले विशेष ध्यान दिएर ठोस कदम चाल्नुपर्ने उनको भनाइ छ।
