काठमाडौं — नेपाल प्रिमियर लिगको तेस्रो संस्करणमा काठमान्डु गोर्खाजले आफ्नो पहिलो खेलमा नै निराशाजनक सुरुआत गरेको छ। त्रिवि क्रिकेट मैदानमा टस जितेर पहिले ब्याटिङ रोजेको गोर्खाज जनकपुर बोल्ट्सविरुद्ध १९ ओभर ३ बलमा ११५ रनमै अलआउट भयो।
जनकपुरको बलिङमा आइकोनिक खेलाडी राहुल यादव सबैभन्दा प्रभावशाली देखिए। उनले चार ओभरमा ३१ रन दिँदै चार विकेट लिए। राहुलले ओपनर साम हिजलेट र स्मित पटेलसँगै कप्तान करण केसी र मोहम्मद आदिल आलमलाई पभेलियन फर्काए। सैफ हसनले दुई विकेट हात पारे भने मोइन अली, कप्तान हर्मीत सिंह र ललित राजवंशीले एक-एक विकेट लिए।
ब्याटिङमा गोर्खाजका लागि भीम सार्कीले मात्र केही प्रतिरोध गरे। उनले २९ बलमा चार चौकासहित ३३ रन बनाए। तर टोलीले खेलभरि कुनै ठूलो साझेदारी बनाउन सकेन। ६ रनमा साम हिजलेट (१ रन) र १९ रनमा हरिशंकर शाह (९ रन) आउट भएपछि गोर्खाज लगातार दबाबमा रह्यो। त्यसपछि रसिद खानले १७, स्मित पटेलले १३ र सुमित महर्जनले १० रन बनाए। कप्तान करण केसी ८ र जहानदाद खान ५ रनमा आउट भए भने मोहम्मद आदिल आलम पहिलो बलमै एलबीडब्लु भए। रिपोन मोन्डल ९ रनमा आउट हुँदा शाहव आलम ४ रनमा अविजित रहे।
गोर्खाजले अनुबन्ध गरेका डेविड वार्नर यस खेलमा उपस्थित थिएनन्। उनी आइतबार मात्र नेपाल आउने बताइएको छ। गोर्खाजले अनुबन्ध घोषणा नगरिएका रिपोन र जहानदादलाई यस खेलमा मैदान उतारेको थियो। उता जनकपुरले भने यसअघिको पहिलो खेल खेलेका जिम्मी निशमलाई बेन्चमै राखेको थियो।
