काठमाडौं । नेपाली कांग्रेसले पार्टीविरुद्ध सुनियोजित रूपमा भ्रम र आरोप फैलाइएको भन्दै आपत्ति जनाएको छ। सभापति गगनकुमार थापाको सचिवालयले सोमबार जारी गरेको विज्ञप्तिमा सरकारका पछिल्ला गतिविधिबाट ध्यान मोड्न प्रतिपक्षी दलमाथि निराधार आरोप लगाइएको उल्लेख छ।
विज्ञप्तिमा भनिएको छ, सरकार लोकतन्त्र र नागरिक स्वतन्त्रताविरुद्ध अघि बढ्दा कांग्रेसले लोकतन्त्र, जनअधिकार र विधिको शासनका पक्षमा आवाज उठाउँछ, र त्यही बेला पार्टीविरुद्ध भ्रम सिर्जना गरेर मूल विषयबाट ध्यान हटाउने प्रयास हुन्छ। विगतमा पनि यस्ता प्रवृत्ति पटकपटक देखिएको सचिवालयको भनाइ छ।
कांग्रेसले पार्टीको विधान र प्रचलित कानुनअनुसार विशेष महाधिवेशन सम्पन्न गरेको र त्यसबाट निर्वाचित नेतृत्व तथा निर्णयको आधिकारिकता निर्वाचन आयोग र अदालतका निर्णयले पुष्टि गरिसकेको पनि विज्ञप्तिमा उल्लेख छ। हालै सम्पन्न १५औँ महाधिवेशनले उक्त विषयलाई थप संस्थागत गरेको कांग्रेसको दाबी छ।
सचिवालयले बिचौलियासँग जोडिएका विषय र त्यससँग सम्बन्धित सबै प्रकरणमा गहिरो, निष्पक्ष र प्रमाणमा आधारित अनुसन्धान हुनुपर्ने माग गरेको छ। दोषी देखिने जोकोहीलाई कानुनी कारबाही गरिनुपर्ने र त्यसमा सरकारलाई कांग्रेसको पूर्ण साथ रहने विज्ञप्तिमा उल्लेख छ।
तर अनुसन्धान निष्पक्ष हुन्छ कि हुँदैन भन्नेमा गम्भीर प्रश्न र आशंका रहेको कांग्रेसले जनाएको छ। नेपाल प्रहरीको छापसहितका तथ्य, प्रमाण र कथित बयान छानिछानी बाहिर ल्याइँदा प्रमाण लुकाउने वा नष्ट गर्ने प्रयास भएको हुनसक्ने र समग्र अनुसन्धान नै प्रभावित हुने आशंका उत्पन्न भएको भनाइ छ। अनुसन्धान चयनात्मक ढंगले अघि बढेको जस्तो देखिएको र अनुसन्धान गर्ने निकायभित्रैका व्यक्तिहरूको संलग्नताका विषय बाहिर आइरहेका भन्दै अनुसन्धान प्रक्रिया पारदर्शी र निष्पक्ष हुनुपर्ने माग गरिएको छ।
कांग्रेसले कुनै पनि निष्पक्ष अनुसन्धानबाट पछि नहट्ने तर अपुष्ट आरोप, राजनीतिक पूर्वाग्रह र भ्रामक प्रचारका आधारमा कसैलाई आरोपित गर्ने प्रवृत्ति स्वीकार्य नहुने स्पष्ट पारेको छ। निष्पक्ष छानबिन सुनिश्चित गर्न संसदीय दलले निर्णय गरिसकेको पनि विज्ञप्तिमा उल्लेख छ।
