सहकारी ठगी प्रकरणमा फरार अभियुक्त गीतेन्द्रबाबु (जीबी) राईले आफूलाई खोज्न कुनै बल प्रयोग गर्न आवश्यक नरहेको र आफू नेपाल फर्कन तयार रहेको सन्देश पठाएका छन्। राईले सेतोपाटीलाई पठाएको अडिओ सन्देश र प्रेस नोटमा आफू नेपाल फर्किएर समस्या समाधान गर्न चाहेको उल्लेख गरेका छन्।
सहकारी ठगी प्रकरणका नाइकेका रूपमा आरोपित राई मलेसियामा लुकेको विश्वास गरिन्छ। नेपाल प्रहरीले उनीविरुद्ध इन्टरपोलमार्फत डिफ्युजन नोटिस र रेड नोटिससमेत जारी गरेको छ, तर उनी अझै नेपाल ल्याइएका छैनन्। प्रहरी अधिकारीहरूका अनुसार नेपाल र मलेसियाबीच प्रत्यर्पण सन्धि नभएकाले मलेसियाबाट उनलाई फिर्ता ल्याउन चुनौती भएको छ।
संसदीय छानबिन समितिको प्रतिवेदनले पोखराको सूर्यदर्शनलगायत पाँच सहकारीबाट ६५ अर्ब ५४ करोड रुपैयाँ अपचलन गरी गोर्खा मिडियामा लगानी भएको उल्लेख गरेको छ। त्यही प्रकरणमा गोर्खा मिडियाका तत्कालीन प्रबन्ध निर्देशक रवि लामिछाने र सञ्चालक छविलाल जोशी पक्राउ परिसकेका छन्।
यसैबीच सरकारले जीबी राईलाई स्वदेश ल्याउन कूटनीतिक पहल तीव्र पारेको छ। गृह मन्त्रालयले मलेसियालाई कूटनीतिक नोट पठाएको थियो, तर जवाफ आएको छैन।
