काठमाडौं । शुक्रबार लगातार सातौं कारोबार दिन सेयर बजार बढेको छ । असोज २२ गतेयता हरेक कारोबार दिन बजार उकालो लागिरहेको छ । आज बजार परिसूचक नेप्से ८ दशमलव २३ अंकले बढेर २६३४ अंकमा कायम भएको छ ।सात दिनसम्म बजार बढे पनि समग्रमा ६२ अंकको मात्रै वृद्धि देखिएको छ । अघिल्लो दिन नेप्से ४ दशमलव ५६ अंकले बढेको थियो ।आज कारोबार रकम पनि केही बढेको छ । अघिल्लो दिन ४ अर्ब ७० करोड रुपैयाँको कारोबार भएकोमा आज ४ अर्ब ८८ करोड रुपैयाँको सेयर किनबेच भयो । मूल्य बढेका कम्पनी १७४, घटेका ९१ र स्थिर रहेका १२ वटा छन् ।आजको बजार वृद्धिमा बैंकिङ समूहको योगदान उच्च रह्यो । लगानीकर्ताको आकर्षण बैंकिङमा कायमै देखियो । बैंकिङ समूह सबैभन्दा धेरै ० दशमलव ७२ प्रतिशतले बढ्यो । विकास बैंक ० दशमलव ४२, जलविद्युत् ० दशमलव ५२ र माइक्रोफाइनान्स ० दशमलव ५३ प्रतिशतले बढे । व्यापार ० दशमलव ५४ र फाइनान्स ० दशमलव २५ प्रतिशतले घटे ।आज चिरख्वा हाइड्रोपावरको सेयर १४ दशमलव ८२ र बेनी हाइड्रोपावरको १२ दशमलव ४६ प्रतिशतले बढ्यो । हिमालयन एभरेस्ट इन्स्योरेन्सको ४ दशमलव ९८ प्रतिशतले घट्यो ।