मोरङ जिल्ला प्रशासन कार्यालयले विराटनगरका होटल व्यवसायीलाई राति १० बजेभित्र होटलको ढोका बन्द गर्न र त्यहाँ बसेका पाहुनालाई साढे १० बजेसम्म बिदा गर्न निर्देशन दिएको छ। केही दिनअघि भएको सर्वपक्षीय छलफलपछि प्रशासनले होटल सञ्चालनको समयसीमा तोकेको हो।
मोरङका सहायक प्रमुख जिल्ला अधिकारी सरोज कोइरालाका अनुसार जिल्लाभरका रात्रिकालीन व्यवसायलाई समेट्ने एकीकृत मापदण्ड तयार नभएसम्मका लागि यो समयसीमा लागू हुनेछ। मापदण्ड तयार भएपछि एक महिनाभित्र नयाँ निर्णय आउने उनले बताए।
कोइरालाले राति १२ बजेसम्म होटलमा बसेर मदिरा सेवन गरेका यात्रु बाहिर निस्किँदा दुर्घटना बढेको र त्यहाँ काम गर्ने महिला कामदारको सुरक्षा पनि चुनौती बनेको बताए। एकीकृत मापदण्ड बनेपछि समय बढ्ने उनको भनाइ छ।
तर प्रदेश सरकारसँग समन्वय नगरी समयसीमा तोकिएको भन्दै कोशी प्रदेशका मुख्यमन्त्री हिक्मतकुमार कार्कीले असन्तुष्टि जनाएका छन्। राज्यले नागरिक तथा पर्यटकलाई चौबीसै घण्टा सुरक्षा दिनुपर्ने बताउँदै उनले प्रशासनको कदमलाई गैरजिम्मेवार र पर्यटनमैत्री नभएको बताएका छन्।
मुख्यमन्त्री कार्कीले पर्यटनका लागि आउने पाहुना बिहान, दिउँसो वा राति जतिबेला पनि आउन र जान सक्ने बताए। विराटनगर विमानस्थल राति अबेरसम्म सञ्चालन हुने र सडक विस्तारसँगै मानिसहरूको आवागमन चौबीसै घण्टा हुने उनको तर्क छ।
छिमेकी मुलुक भारतका सीमावर्ती शहरबाट साँझ ८–९ बजे विराटनगर वा आसपास आइपुग्ने यात्रुलाई लक्षित गर्दै उनले राति १० बजेदेखि बिहानसम्म आइपुगे भने के भन्ने भनी प्रश्न गरेका छन्। देशभित्रकै सडक यातायातबाट राति आइपुग्ने व्यक्तिलाई बसमै बस्नुस् भन्न मिल्छ कि भन्ने उनको प्रश्न छ।
स्थानीय प्रशासनले संवेदनशील र दीर्घकालीन असर पर्ने निर्णय लिनुअघि प्रदेश सरकार तथा स्थानीय तहसँग समन्वय र सल्लाह गर्नुपर्ने मुख्यमन्त्री कार्कीले बताएका छन्। यस्ता सूचना प्रकाशन गर्नुअघि १० पटक सोच्नुपर्ने र देशको प्रतिष्ठा, पर्यटन क्षेत्र र व्यवसायीलाई नकारात्मक असर पर्ने कुनै पनि काम गरिनु नहुने उनको भनाइ छ।
