काठमाडौं — नेपाली कम्युनिष्ट पार्टी (नेकपा) का संयोजक पुष्पकमल दाहाल प्रचण्डले मुलुक असाधारण संकटमा परेको भन्दै देशका सबै वामपन्थी शक्ति एक ठाउँमा आउनुपर्ने बताएका छन् । मंगलबार काठमाडौंमा आयोजित पार्टी एकता घोषणा कार्यक्रममा बोल्दै उनले नेकपा एमालेसहित विभिन्न धारमा रहेका कम्युनिस्ट समूहलाई एकताका लागि आह्वान गरे ।
कार्यक्रममा नेपाली कम्युनिष्ट पार्टी र नेपाल कम्युनिष्ट पार्टीबीच एकता घोषणा गरिएको थियो । त्यस अवसरमा प्रचण्डले आफूहरूले विगतमा विभिन्न ढंगले सहकार्य र एकता गर्दा थुप्रै उतारचढाव भोगेको स्मरण गरे । मुलुकको स्वाधीनता जोगाउन फेरि एक पटक एकताबद्ध हुनु जरुरी रहेको उनको भनाइ थियो ।
उनले केपी ओली, मोहन विक्रम सिंह, मोहन वैद्य किरण र नेत्रविक्रम चन्द विप्लवलगायत सबै बाँकी कम्युनिस्ट समूहलाई पनि एकतामा जोड्नुपर्ने बताए । हिजो माओवादी र एमालेका विभिन्न धारमा रहेका नेता–कार्यकर्तालाई जोड्ने जिम्मेवारी आफूहरूकै काँधमा रहेको उनले उल्लेख गरे ।
कार्यक्रममा माधव नेपालले केपी ओलीको नाम लिँदा के हुने हो भन्ने प्रश्न उठाएको प्रसंग उल्लेख गर्दै प्रचण्डले आफूलाई त्यस्तो नलागेको बताए । उमा भुजेलले कम्युनिस्टहरूको एकता आजको देशको वस्तुगत आवश्यकता बनेको बताएकी थिइन् ।
प्रचण्डले सबैले आफ्नो सोचाइ, बुझाइ र भावनालाई अझ फराकिलो बनाउनुपर्नेमा जोड दिए । सबै खालका आग्रह, पूर्वाग्रह र सङ्कीर्णताबाट मुक्त भएर राष्ट्र र देशलाई प्राथमिकतामा राखेर एकताबद्ध हुनु आजको आवश्यकता भएको उनको भनाइ थियो ।
