कोशी प्रदेशका प्रदेश प्रमुख परशुराम खापुङले देशको विविधतालाई अँगालेर मात्र राष्ट्रिय एकता मजबुत बनाउन सकिने बताएका छन्। मंगलबार विराटनगरस्थित प्रदेश प्रमुखको कार्यालयमा आदिवासी जनजाति आयोगको सातौँ वार्षिक प्रतिवेदन बुझ्दै उनले सबै जातजाति र समुदायको बराबरी तथा समन्वित विकासले मात्र एकता सुदृढ हुने धारणा राखे।
प्रदेश प्रमुख खापुङका अनुसार मुलुकका सबै समुदायका भाषा, संस्कृति, पहिरन, परम्परा र जीवनशैली राष्ट्रकै सम्पत्ति हुन्। त्यसैले ती सम्पदाको संरक्षण गर्नु राज्यको जिम्मेवारी भएको उनको भनाइ थियो। समावेशितालाई व्यवहारमा उतार्न नसके राष्ट्रिय एकता केवल नारामा सीमित हुने उनले बताए।
संविधानको धारा २९४ को उपदफा ३ अनुसार आयोगका अध्यक्ष रामबहादुर थापा मगरले प्रतिवेदन प्रदेश प्रमुखलाई हस्तान्तरण गरेका थिए। सो अवसरमा अध्यक्ष थापा मगरले आयोगले दिएको २० बुँदे सिफारिस कार्यान्वयन गर्न माग गरे।
आयोगको सिफारिसमा आदिवासी जनजाति समुदायका अधिकार, भाषा र संस्कृतिको संरक्षणसँग सम्बन्धित विषय समेटिएका छन्। प्रतिवेदन ग्रहणपछि प्रदेश प्रमुख खापुङले सिफारिसहरूको कार्यान्वयनतर्फ ध्यान दिनुपर्ने बताए।
