काठमाडौं । नेपाली कांग्रेसका वरिष्ठ उपसभापति विश्वप्रकाश शर्माले पछिल्लो समय पत्रकारहरू असुरक्षित बन्दै गएको भन्दै चिन्ता व्यक्त गरेका छन्। बुधबार पार्टी केन्द्रीय कार्यालय सानेपामा आयोजित पत्रकार सम्मेलनमा उनले सञ्चारकर्मीको सुरक्षाको अवस्थामाथि गम्भीर प्रश्न उठाए।
शर्माले पत्रकारहरू प्रतिपक्षी दलको कार्यालयमा प्रश्न सोध्न आउँदा उनीहरूको हातमा कालोपट्टी देखिने अपेक्षा गरेको बताए। तर कसैको हातमा पनि त्यस्तो चिह्न नदेखिएपछि सञ्चारकर्मीहरू आफैँ सुरक्षित छन् कि छैनन् भनेर सोध्नुपरेको उनले बताए।
प्रतिपक्षीकै कार्यालयमा आएर पनि बुम अगाडि बढाउँदै गर्दा पत्रकार साथीहरूको हातमा कतै कालोपट्टी होला भन्ने आफूलाई लागेको उनले बताए। कसैको हातमा त्यस्तो चिह्न नदेखिएकाले सबैभन्दा पहिले पत्रकारहरू नै सुरक्षित छन् कि छैनन् भनेर प्रश्न गर्न चाहेको उनको भनाइ थियो।
शर्माले पत्रकारहरूले आफ्नो असहमति खरो रूपमा राख्न सक्नुपर्ने बताए। प्रतिपक्षीको कार्यालयदेखि सिंहदरबार र बालुवाटारसम्म पुगेर प्रधानमन्त्रीकै अगाडि पनि आफ्ना विचार र असन्तुष्टि व्यक्त गर्न सक्ने वातावरण हुनुपर्ने उनको भनाइ थियो। प्रेस स्वतन्त्रता लोकतन्त्रको आधार भएकाले सञ्चारकर्मीको सुरक्षा सुनिश्चित गर्नु सबैको दायित्व भएको उनले बताए।
पत्रकारहरूमाथि हुने कुनै पनि प्रकारको दबाब र त्रास लोकतन्त्रका लागि हानिकारक हुने उनले बताए। सञ्चारकर्मीले निर्भय भएर काम गर्न पाउने वातावरण बनाउन सबै पक्ष गम्भीर हुनुपर्ने उनको भनाइ थियो।
