अमेरिकी मध्यावधि चुनावमा डेमोक्र्याटले कंग्रेसको नियन्त्रण हात पारेपछि राष्ट्रपति डोनाल्ड ट्रम्पमाथि आफ्नै रिपब्लिकन पार्टीभित्रबाट कडा दबाब बढेको छ। ट्रम्पले समर्थन गरेका उम्मेदवारहरू प्रमुख प्रतिस्पर्धामा पराजित भएपछि पार्टीका सहयोगी र रणनीतिकारहरूले ह्वाइट हाउसको टिम फेर्न, अनुशासन फर्काउन र हारको कारण मानिएका नीतिहरू सच्याउन माग गरेका छन्।
अनुभवी रिपब्लिकन रणनीतिकार जोन फिहेरीले नतिजालाई ट्रम्पका लागि ‘ठूलो विपत्ति’ भनेका छन्। ‘उनले टिम सफा गर्नुपर्छ,’ फिहेरीले भने, ‘आजदेखि हरेक दिन उनी झन् कमजोर हुँदै जानेछन्।’ पार्टीभित्रका आलोचकहरूले आठ महिनादेखि चलिरहेको इरान युद्ध र भन्सार महसुल (ट्यारिफ) लाई हारको मुख्य कारण मानेका छन्।
तर ट्रम्पले भने नतिजालाई आफ्नो अस्वीकृति मान्न तयार देखिएका छैनन्। मंगलबार राति फक्स न्युजसँग कुरा गर्दै उनले भने, ‘म यसलाई आफूमाथिको प्रहार मान्दिनँ।’ उनले इरान युद्धले रिपब्लिकन उम्मेदवारलाई नोक्सान पुर्याएको स्वीकार गरे पनि युद्ध सुरु गर्ने निर्णयको भने बचाउ गरे।
उपराष्ट्रपति जेडी भान्सले पनि इरान युद्धलाई हारको कारण भन्दै ट्रम्पबाट केही दूरी बनाएको देखिएको छ। भान्सलाई ट्रम्पको सम्भावित राजनीतिक उत्तराधिकारी मानिन्छ। पार्टीका रणनीतिकारहरूका अनुसार सन् २०२८ को राष्ट्रपति चुनाव नजिकिँदै जाँदा यस्ता मतभेद अझ बढ्न सक्छन्।
यसैबीच ह्वाइट हाउसभित्र कर्मचारीको बिदाइ, मन्त्रिपरिषद्मा फेरबदल र डेमोक्र्याटको अनुसन्धानको तयारी भइरहेको छ। कंग्रेसमा नियन्त्रण पाएपछि डेमोक्र्याटले ट्रम्पका विधेयक रोक्न, प्रशासनको छानबिन गर्न र मनोनयनमाथि प्रश्न उठाउन सक्नेछन्।
