काठमाडौं । नेपाल प्रिमियर लिग (एनपीएल) को तेस्रो संस्करणमा पाकिस्तानका अनुभवी बलर उसामा मिर चितवन राइनोजबाट खेल्ने भएका छन् । चितवनले सामाजिक सञ्जालमार्फत मिरलाई टोलीमा अनुबन्ध गरेको जानकारी गराएको हो । ३० वर्षीय मिरको आगमनले टोली थप बलियो बनेको क्लबले जनाएको छ ।
दायाँहाते लेगस्पिन बलिङ गर्ने मिरले सन् २०२३ मा न्युजील्यान्डविरुद्धको एकदिवसीय खेलबाट पाकिस्तानको राष्ट्रिय टोलीमा पदार्पण गरेका थिए । त्यसयता उनले पाकिस्तानका लागि १२ एकदिवसीय र ५ टी–२० अन्तर्राष्ट्रिय खेल खेलेका छन् ।
मिर विश्वका प्रतिष्ठित व्यावसायिक लिगहरूमा समेत देखिएका छन् । उनले पाकिस्तान सुपर लिग, बिग बास लिग, बंगलादेश प्रिमियर लिग र क्यारेबियन प्रिमियर लिगमा प्रतिस्पर्धा गरिसकेका छन् । अनुभवी विदेशी स्पिनरको आगमनले चितवनको बलिङ आक्रमण थप सशक्त हुने अपेक्षा गरिएको छ ।
एनपीएलको तेस्रो संस्करण कात्तिक ९ गतेदेखि काठमाडौंमा आयोजना हुँदैछ ।
