काठमाडौँ — पेशाले इन्जिनियर बनेका गोरखाका कुमार लामिछाने पछिल्ला केही वर्षयता दुग्ध व्यवसायीका रूपमा परिचित भएका छन्। राजधानीको नागार्जुन नगरपालिका–६, रामकोटस्थित डाँडापौवामा सञ्चालित उनको फार्मले अहिले हरेक महिना करिब १५ लाख रुपैयाँ शुद्ध बचत गरिरहेको छ।
गोरखा सिरानचोक गाउँपालिका–७ का सिभिल इन्जिनियर लामिछानेले २०७७ साल जेठमा क्षितिज एकीकृत कृषि फार्म प्रालि दर्ता गरेर पशुपालन थालेका हुन्। सुरुमा करोडौं रुपैयाँ लगानी र ६ रोपनी भाडाको जग्गाबाट ३० वटा भैँसीले सुरु भएको यो व्यवसाय अहिले २०० गाई र ५० वटा भैँसीसम्म फैलिएको छ।
फार्मबाट अहिले दैनिक झन्डै एक हजार दुई सय लिटर दूध उत्पादन हुन्छ। भैँसीको दूध प्रतिलिटर १७० र गाईको १०० रुपैयाँमा बिक्री हुने उनी बताउँछन्। दूध विकास संस्थान, नमूना डेरीसँगै उपत्यकाका विभिन्न डेरीमार्फत दूध बिक्री भइरहेको छ। दूध बिक्रीबाट मासिक ४५ देखि ५० लाख आम्दानी हुने र सबै खर्च कटाएर १५ लाख बचत रहने लामिछानेको भनाइ छ। पशुआहार पराल र दानामा सबैभन्दा धेरै खर्च हुने उनी स्वीकार्छन्।
निर्माणसम्बन्धी कामसँगै सात वर्षदेखि यो व्यवसाय चलाइरहेका लामिछानेका जीवनसाथी इन्जिनियर सङ्गीतासँगै यसमा सहकार्य छ। दुहनका लागि मेसिन जडान गरिएको फार्ममा अहिले प्रत्यक्ष–अप्रत्यक्ष गरी ५० जनाले रोजगारी पाएका छन्।
