अमेरिकी राष्ट्रपति डोनाल्ड ट्रम्पले फ्रान्सकी दक्षिणपन्थी नेतृ मरिन ले पेनको खुलेआम प्रशंसा गरेका छन्। उनले ले पेनलाई ‘रूढीवादी आवाज’ को संज्ञा दिए पनि सन् २०२७ को फ्रान्सेली राष्ट्रपति निर्वाचनमा उनलाई समर्थन गर्छन् वा गर्दैनन् भन्ने विषयमा स्पष्ट जवाफ दिन ट्रम्पले टाले।
ले पेनलाई समर्थन गर्नुहुन्छ कि भन्ने पत्रकारको प्रश्नमा ट्रम्पले आफूले उनीसँग भेट नगरेको स्वीकार गरे। तर उनको भनाइमा ले पेनमाथि न्याय प्रणालीलाई दुरुपयोग गरेर अन्याय गरिएको थियो।
ले पेन सन् २०२५ को मार्चमा भ्रष्टाचारसम्बन्धी मुद्दामा दोषी ठहर भएकी थिइन्। उनी ५८ वर्षकी छन्। अदालतले सुरुमा उनलाई पाँच वर्षसम्म कुनै पनि निर्वाचनमा उम्मेदवार बन्न प्रतिबन्ध लगाएको थियो। तर यसै वर्ष पुनरावेदन अदालतको निर्णयसँगै सन् २०२७ को राष्ट्रपति निर्वाचनमा उनी प्रतिस्पर्धा गर्न पाउने सम्भावना खुलेको छ।
ट्रम्प स्वयंले अमेरिकी न्याय प्रणालीलाई राजनीतिक हतियार बनाइएको आरोप लगाउँदै आएका छन्। उनले ले पेनको मुद्दालाई पनि यही प्रसङ्गसँग जोडे। उनले पछिल्ला समय दक्षिण अमेरिकाका निर्वाचनमा आफूले समर्थन गरेका दक्षिणपन्थी उम्मेदवारले जित हासिल गरेको दाबी पनि गरे।
अमेरिकामा मध्यावधि निर्वाचन नजिकिँदै गर्दा ट्रम्पले फ्रान्समा देखिएको अशान्तिलाई आप्रवासन र वामपन्थी राजनीतिविरुद्ध आफ्नो दृष्टिकोण प्रस्तुत गर्ने मौकाका रूपमा उपयोग गर्दै आएका छन्। फ्रान्सबारे उनले भने, ‘त्यो सामान्य दङ्गा थिएन, क्रान्तिजस्तै थियो र अझै जारी छ।’ कान्सासको चुनावी सभामा उनले फ्रान्स आप्रवासी, जिहादी र कम्युनिस्टहरूबाट कब्जा भइरहेको आरोप लगाएका थिए।
