फ्रान्सका विभिन्न सहरमा देखिएको हिंसात्मक गतिविधिले देशको पर्यटन क्षेत्रमा गहिरो चिन्ता पैदा गरेको छ। दङ्गाका दृश्य अन्तरराष्ट्रिय सञ्चारमाध्यममा व्यापक रूपमा छाएपछि पर्यटक आगमनमा कमी आउने र पर्यटन आम्दानी खुम्चिने डर पर्यटन व्यवसायीहरूले व्यक्त गरेका छन्।
पर्यटन क्षेत्रका छाता सङ्गठन एडिएन टुरिजमकी प्रमुख क्रिस्टेल कासाग्नेले निस, पेरिस र लियोनजस्ता प्रमुख सहरमा भएको हिंसालाई विनाशकारी भनेकी छिन्। पर्यटकहरू रमाउन र होटलमा बस्न आउने हुन्, हिंसाको डरले कोठाभित्र थुनिन होइन भन्ने उनको भनाइ छ। प्रहरीसँगको भिडन्त, सार्वजनिक भवनमा आगजनी, पसलमा लुटपाट र सडक हिंसाका दृश्यले सामाजिक सञ्जालमा फ्रान्सको मनोरम छविलाई पनि धक्का दिएको छ। कतिपय पर्यटकले पेरिस सुरक्षित छ कि छैन भन्ने प्रश्न उठाएका छन् भने केहीले यात्रा नै रद्द वा स्थगित गर्ने विचार गरिरहेका छन्।
परामर्श संस्था प्रोटुरिजमका प्रमुख डिडियर अरिनोका अनुसार पेरिस, लियोन र मार्सेमा होटल बुकिङ रद्द हुने दर बढिरहेको छ। पेरिस केन्द्रमा भएको एक दिनको दङ्गापछि बुकिङ रद्द दर करिब एक प्रतिशतले बढेको छ। सन् २०२६ का लागि अनुमान गरिएको चार करोड २० लाख होटल बुकिङको तुलनामा यो तत्काल ठुलो गिरावट नभए पनि हिंसा दोहोरिए असर गम्भीर बन्ने उनको चेतावनी छ।
फ्रान्सले हरेक वर्ष करिब १० करोड पर्यटकलाई स्वागत गर्छ र पर्यटनबाट ७० अर्ब युरोभन्दा बढी आम्दानी गर्छ। लामो दूरीबाट आउने पर्यटकले बढी खर्च गर्ने भएकाले उनीहरूको सङ्ख्या घट्दा राजस्वमा समेत असर पर्ने देखिन्छ। अमेरिका, चीन र जर्मनीलगायतका देशले यात्रा सल्लाह जारी गरेपछि बुकिङमा थप चाप परेको छ। ट्राभल एजेन्सी समूह सेलेक्टुरका कार्यकारी प्रमुख लरेन्ट एबिटबोलका अनुसार दुई साताभित्र हिंसा नियन्त्रणमा आए क्षति सीमित रहन सक्छ, तर महिनौँसम्म जारी रहे पर्यटन क्षेत्रका लागि विनाशकारी हुनेछ। होटल तथ्याङ्क विश्लेषक संस्था एमकेजी कन्सल्टिङका अनुसार पेरिसका होटलले आगामी छ साताका सम्भावित बुकिङ गुमाएका छन्, र निकट भविष्यका तथा महँगा होटलका बुकिङमा असर बढी देखिएको छ।
