अक्टोबर २०२५ मा युद्धविराम सम्झौता लागू भए पनि गाजामा हिंसा थामिएको छैन। त्यसयता इजरायली हमलामा ३४० भन्दा बढी बालबालिकाले ज्यान गुमाएका छन्।
संयुक्त राष्ट्रसङ्घीय बालकोष (युनिसेफ) का प्रवक्ता रिकार्डो पिरेसले यो तथ्यांक जेनेभास्थित संयुक्त राष्ट्रसङ्घको मुख्यालयमा आयोजित पत्रकार सम्मेलनमा सार्वजनिक गरेका हुन्। उनका अनुसार युद्धविरामपछि पनि सयौँ बालबालिका घाइते भएका छन्। पछिल्ला दुई सातामा मात्र भएका आक्रमणमा पाँच बालक र दुई बालिकाको मृत्यु भएको र कम्तीमा ३३ बालबालिका गम्भीर घाइते भएको उनले जानकारी दिए।
गाजा स्ट्रिपमा जारी नाकाबन्दीकै बीच सर्वसाधारणमाथि आक्रमण भइरहेको उनले बताए। अहिले पनि करिब आठ लाख बालबालिका विस्थापित अवस्थामा छन्, जसमध्ये अधिकांश त्रिपाल र बस्न जोखिमपूर्ण भवनमा बस्न बाध्य छन्।
जाडो याम नजिकिँदै गर्दा अवस्था झन् बिग्रन सक्ने चेतावनी उनले दिए। यसरी लगातार चौथो वर्ष प्यालेस्टिनी बालबालिकाले अमानवीय र बस्न अयोग्य परिस्थितिको सामना गर्नुपर्ने अवस्था आएको उनको भनाइ छ।
