काठमाडौं — नेपाल प्रिमियर लिग (एनपीएल) अन्तर्गत मंगलबार कीर्तिपुरस्थित त्रिभुवन विश्वविद्यालय क्रिकेट मैदानमा दुई खेल खेलिँदै छन्। दिनको पहिलो भिडन्तमा दिउँसो साढे १२ बजे विराटनगर किंग्स र जनकपुर बोल्ट्स आमनेसामने हुनेछन्। साँझ ५ बजे हुने दोस्रो खेलमा लुम्बिनी लायन्सले पोखरा एभेन्जर्सको सामना गर्नेछ।
अहिलेसम्म तीन खेल खेलेको विराटनगरले एउटा खेलमा मात्रै सफलता पाएको छ। आफ्नो चौथो खेलमा टोली दोस्रो जित निकाल्ने लक्ष्यसहित मैदान उत्रनेछ। यता जनकपुरले तीन खेलमा दुई जित र एक हारको नतिजा निकालेको छ। आजको खेल जिते जनकपुरले लगातार तेस्रो सफलता हात पार्नेछ।
साँझको खेलमा अपराजित लुम्बिनी लायन्स मैदानमा उत्रनेछ। दुई खेल खेलेको लुम्बिनीले एउटामा जित हात पारेको छ भने अर्को खेल वर्षाका कारण रोकिएर अंक बाँडफाँट भएको थियो। अर्कोतर्फ पोखरा एभेन्जर्सले खेलेका दुवै खेलमा हार बेहोरेको छ। तेस्रो खेलमा पोखरामाथि जित निकाल्नै पर्ने दबाब छ।
दुवै खेलमा अंकतालिकामा आफ्नो स्थान बलियो बनाउने होड रहनेछ।
