अफगानिस्तानको पश्चिमी निमरोज प्रान्तमा प्रहरीले मानव तस्करीको प्रयासबाट १२७ जनाको उद्धार गरेको छ। प्रान्तीय प्रहरी प्रवक्ता मावलवी गुल मोहम्मद कुद्रतले बिहीबार दिएको जानकारीअनुसार ती व्यक्तिको उद्धार बुधबार गरिएको हो। संदिग्ध तस्करहरूले उनीहरूलाई निमरोज हुँदै अवैध रूपमा देशबाहिर लैजान खोजेका थिए।
उद्धारका क्रममा ओसारपसारमा प्रयोग गरिएका पाँचवटा सवारीसाधन पनि प्रहरीले नियन्त्रणमा लिएको छ। प्रहरीले घटनाबारे थप विवरण सार्वजनिक गरेको छैन। कसैलाई पनि अवैध रूपमा सीमा पार गर्न नदिने र मानव तस्करीमा संलग्न व्यक्तिमाथि कडा कारबाही गर्ने चेतावनी प्रहरीले दिएको छ।
यसअघि गत साता पनि निमरोज प्रान्तमै यस्तै प्रयास विफल भएको थियो। त्यतिबेला प्रहरीले अवैध रूपमा विदेश लैजान लागिएका ८९ जनालाई उद्धार गरेको थियो र मानव तस्करीमा संलग्न भएको आशङ्कामा तीन जनालाई पक्राउ गरेको थियो। ती व्यक्तिलाई पनि विदेश लैजाने प्रयास भइरहेको अवस्थामा उद्धार गरिएको थियो।
लामो युद्धबाट प्रभावित अफगानिस्तानमा गरिबी र बेरोजगारी व्यापक रहेकाले धेरै नागरिक राम्रो रोजगारीको खोजीमा अवैध बाटोबाट विदेश जाने गरेका छन्। यही अवस्थाको फाइदा उठाउँदै तस्करहरूले मानिसलाई गैरकानुनी रूपमा देशबाहिर लैजाने प्रयास गर्दै आएको प्रहरीको भनाइ छ।
