अफ्रिकाको साहेल क्षेत्रमा अवस्थित बुर्किना फासोमा इस्लामिक लडाकु समूहबीचको द्वन्द्व उत्कर्षमा पुगेको छ। सहारा मरुभूमिभन्दा दक्षिणतिर पर्ने साहेल भनिने बुर्किना फासोको उत्तरतर्फ इस्लामिक स्टेट र अल कायदाजस्ता इस्लामिक लडाकु समूहको सक्रियता रहँदै आएको छ।
नाइजर र मालीसँगको सीमानजिकै औडालान क्षेत्रमा इस्लामिक स्टेटको साहेल प्रान्त र अल कायदासँग सम्बद्ध जमात नुस्रत अल इस्लाम वाल मुस्लिमिन नामक समूहबीच बारम्बार झडप हुँदै आएको छ। पछिल्लो झडपका क्रममा यस क्षेत्रमा जमातका ४ सयभन्दा धेरै लडाकु मारिएको इस्लामिक स्टेटले दाबी गरेको छ।
इस्लामिक स्टेटको दाबीको स्वतन्त्र पुष्टि भने नभइसकेको अरब सञ्चार माध्यमले जनाएका छन्। समाचारमा जनाइएअनुसार तीन मुलुकको सीमा क्षेत्रमा अक्टोबर महिनाको दोस्रो सातादेखि दुई इस्लामिक लडाकु समूहबीच झडप सुरु भएको थियो।
यस क्षेत्रमा इस्लामिक लडाकु गतिविधिको निगरानी गर्ने विश्लेषकहरूका अनुसार यो दुई समूहबीच भएको हालसम्मकै घातक भीडन्त हो। गत सेप्टेम्बर महिनामा पनि सोही क्षेत्रमा भएको भीडन्तमा परी २ सयभन्दा धेरैको ज्यान गएको इस्लामिक स्टेटले दाबी गरेको थियो।
जानकारहरूका अनुसार सन् २०१९ देखि हालसम्म इस्लामिक स्टेट साहेल प्रान्त र अल कायदा सम्बद्ध जमात नुस्रत अल इस्लाम वाल मुस्लिमिनबीच ३ सय २० भन्दा धेरै पटक भीडन्त भइसकेका छन्। भीडन्तका कारण २ हजार २ सय जनाको ज्यान गइसकेको छ।
यसअघि माली र बुर्किना फासोमा सीमित यस्ता भीडन्त पछिल्लो समय नाइजर र उत्तर पश्चिमी नाइजेरियासम्म विस्तार हुन थालेका छन्। खासगरी सीमावर्ती क्षेत्रको नियन्त्रणका लागि यी दुई समूह आपसमा लड्ने गर्छन्। दुर्गम र कठिन भौगोलिक क्षेत्रमा राज्यको उपस्थिति शून्यप्रायः रहेकाले यो क्षेत्र इस्लामिक अतिवादका लागि उर्वर भूमि रहँदै आएको छ।
यस क्षेत्रमा अझै पनि अल कायदा आबद्ध जमात नुस्रत अल इस्लाम वाल मुस्लिमिन नै धेरै प्रभावशाली छ। यस समूहमा ७ देखि ८ हजार लडाकु रहेको अनुमान गरिन्छ। इस्लामिक स्टेटको साहेल प्रान्तमा भने २ हजार आसपास लडाकु संलग्न छन्।
