जनकपुरधाम । मधेश प्रदेशमा नयाँ सत्ता समीकरण बनाउन दुई दलका शीर्ष नेतृत्व वार्तामा जुटेका छन्। नेकपा एमाले र जनता समाजवादी पार्टी नेपालले प्रदेशमा नयाँ गठबन्धन सरकार गठनको सम्भावनाबारे औपचारिक छलफल गरेका हुन्।
वार्तामा एमाले अध्यक्ष केपी शर्मा ओली र जसपा नेपालका अध्यक्ष उपेन्द्र यादवसहित दुवै दलका नेताहरू सहभागी थिए। जसपा नेपालका मधेश प्रदेश संसदीय दलका नेता सरोज कुमार यादव पनि छलफलमा उपस्थित थिए।
वार्तामा सहभागी एक नेताका अनुसार जसपा नेपालकै नेतृत्वमा नयाँ सरकार बनाउने गरी छलफल केन्द्रित भएको छ। सरोज कुमार यादवलाई मुख्यमन्त्री बनाएर नयाँ गठबन्धन खडा गर्ने प्रयास भइरहेको ती नेताले बताए।
शुक्रबार एमालेले नेपाली कांग्रेस नेतृत्वको मधेश प्रदेश सरकारबाट समर्थन फिर्ता लिएपछि प्रदेशसभामा नयाँ समीकरणको बाटो खुलेको हो।
मधेश प्रदेशसभामा जसपा नेपाल २७ सिटसहित सबैभन्दा ठूलो दल हो भने एमाले २३ सिटसहित दोस्रो ठूलो दल हो। कांग्रेसका २२ र नेपाली कम्युनिस्ट पार्टी (नेकपा) का १५ सिट छन्। कुल १०७ सदस्य रहेको प्रदेशसभामा सरकार गठनका लागि ५४ सिटको बहुमत आवश्यक पर्छ।
