भारतीय विदेश सचिव विक्रम मिश्री आज काठमाडौं आउँदै छन्। प्रधानमन्त्री बालेन्द्र शाह (बालेन) को आगामी भारत भ्रमणको तयारीसँग जोडिएको यो भ्रमणमा उनले आजैदेखि उच्चस्तरीय भेटघाट थाल्ने भएका छन्।
मिश्री आज बिहान करिब नौ बजे त्रिभुवन अन्तर्राष्ट्रिय विमानस्थलमा आइपुग्ने कार्यक्रम छ। आजै उनले परराष्ट्रमन्त्री शिशिर खनाल, अर्थमन्त्री स्वर्णिम वाग्ले र परराष्ट्र सचिव अमृतबहादुर राईसँग भेटघाट गर्नेछन्।
उनले प्रधानमन्त्री बालेनसँग पनि आजै वा भोलि शिष्टाचार भेट गर्ने तयारी रहेको स्रोतले जनाएको छ। प्रधानमन्त्रीसँगको भेट आजै हुने गरी तालिकामा राखिएको भए पनि कार्यव्यस्तताका कारण भोलिसम्म सर्न सक्ने बताइएको छ।
यसबाहेक मिश्रीले सत्तारुढ दल रास्वपाका सभापति रवि लामिछाने, ऊर्जामन्त्री विराजभक्त श्रेष्ठ र पूर्वाधार विकासमन्त्री सुनिल लम्सालसँग पनि शिष्टाचार भेट गर्ने कार्यक्रम रहेको छ। काठमाडौंमा भेटघाट सकेर उनी भोलि कात्तिक १९ गते अपराह्न स्वदेश फर्किनेछन्।
केही महिनाअघि प्रधानमन्त्री बालेनले भेटघाटको समय नमिलाउँदा निर्धारण भइसकेको भ्रमण स्थगित भएको समाचार सार्वजनिक भएको थियो। त्यसैले मिश्रीको अहिलेको भेटघाटलाई चासोका साथ हेरिएको छ।
नेपाल र भारत दुवै देशका अधिकारीले मंसिरको दोस्रो साता प्रधानमन्त्री बालेनको भारत भ्रमण हुने गरी तयारी गरिरहेको स्रोतले जनाएको छ। नेपालका लागि नवनियुक्त भारतीय राजदूत सुधाकर दलेला पनि मंगलबार काठमाडौं आइपुगेका छन्।
यही कात्तिक ११ गते भारतीय विदेश मन्त्रालयका प्रवक्ता रणधीर जयसवालले नेपालका प्रधानमन्त्रीलाई भारत भ्रमणको निमन्त्रणा गरिसकेको जानकारी दिएका थिए। स्रोतका अनुसार परराष्ट्र मन्त्रालयका अधिकारीहरू प्रधानमन्त्री शाहको भारत भ्रमणको औपचारिक मिति छिट्टै सार्वजनिक गर्ने तयारीमा छन्। त्यो मिति मिश्रीको यही भ्रमणपछि सार्वजनिक हुने बताइएको छ।
