गाजामा युद्धविराम लागू भएको एक वर्ष बितिसक्दा पनि इजरायली आक्रमण रोकिएको छैन। पछिल्लो हमलामा एक बालकसहित कम्तीमा आठ जनाको मृत्यु भएको अस्पतालहरूले जनाएका छन्।
उत्तरी गाजा सहरको अल–रिमाल क्षेत्रमा रहेको काइरो स्कुल नजिकै भेला भएका सर्वसाधारणमाथि मिसाइल खसालिएको थियो। उक्त हमलामा चार वर्षका बालकसहित तीन जनाको ज्यान गएको अस्पतालका अधिकारीहरूले बताएका छन्।
त्यसैगरी दक्षिणी सहर खान युनिसको अल–मावासी क्षेत्रमा नियमित ड्युटीमा खटिएका प्रहरी अधिकारीहरूको टोलीमाथि ड्रोन आक्रमण भएको छ। हमासद्वारा सञ्चालित गृह मन्त्रालयका अनुसार उक्त आक्रमणमा पाँच जना प्रहरी अधिकारी मारिएका छन्। मन्त्रालयले २३ देखि ५३ वर्ष उमेर समूहका ती पाँचै जनाको नाम सार्वजनिक गर्दै घटनालाई नरसंहार भनेको छ।
इजरायली सेनाले भने सैन्य क्षेत्रमा सक्रिय रहेका दुई समूहलाई निशाना बनाइएको दाबी गरेको छ। तर सेनाले आफ्नो दाबी पुष्टि गर्ने कुनै प्रमाण वा थप विवरण सार्वजनिक गरेको छैन।
गाजा सहरको शिफा अस्पताल बाहिर सेतो कपडामा बेरिएका दुई वयस्क र एक बालकको शव नजिकै मानिसहरू प्रार्थनामा जुटेको दृश्य देखिएको छ। खान युनिसको नासेर अस्पताल बाहिर शव राखिएपछि आफन्तहरू शोकमा डुबेका थिए।
गत वर्षको अक्टोबरमा गाजामा युद्धविराम लागू भएको थियो। त्यसयता पनि इजरायली हवाई आक्रमण लगभग दैनिकजसो भइरहेको छ।
