न्यूयोर्क । संयुक्त राष्ट्रसङ्घीय सुरक्षा परिषद्ले साउदी अरबमाथि हुथी विद्रोहीले गरेको आक्रमणको कडा निन्दा गरेको छ ।परिषद्का सदस्यहरूले बिहीबार जारी वक्तव्यमा नागरिक उड्डयन तथा ऊर्जा पूर्वाधारसमेतलाई लक्षित गरी साउदी अरबविरुद्ध भइरहेका निरन्तर तथा बढ्दो हमलाको निन्दा गरेका हुन् ।उनीहरूले लाल सागर र बाब अल मन्डेब जलघाँटीमा व्यापारिक जहाजमाथि भइरहेका आक्रमण र धम्कीप्रति पनि गम्भीर चिन्ता व्यक्त गरे । व्यावसायिक जहाज र चालक दलको सुरक्षा सुनिश्चित गर्नुका साथै समुद्री गतिविधिमा अन्तर्राष्ट्रिय कानुन, विशेषगरी समुद्री कानुनसम्बन्धी संयुक्त राष्ट्रसङ्घीय महासन्धिको सम्मान गर्नुपर्नेमा उनीहरूले जोड दिए ।परिषद्ले हुथीहरूलाई यमनमा सैन्य गतिविधि तत्काल रोक्न आग्रह गरेको छ । हिंसा वा बल प्रयोगबाट यमनमा दिगो शान्ति स्थापना हुन नसक्ने स्पष्ट पार्दै परिषद्ले राजनीतिक समाधानप्रतिको समर्थन पनि दोहोर्‍याएको छ ।